ბაღში ბოტანიკური ბაღი

ბათუმის ბოტანიკური ბაღი შავი ზღვის სანაპიროზე, ბათუმიდან 9 კილომეტრში მდებარეობს. პარკი 113 ჰექტარ ფართობს მოიცავს. პარკის შექმნის მოსამზადებელი სამუშაოები XIX საუკუნის მიწურულს დაიწყო. 1881 წელს ფრანგმა ლანდშაფტის არქიტექტორმა მეჩისლავ დ’ალფონსმა (1856–1898) შეიძინა 35 დესიატინა (დაახლოებით 38,2 ჰექტარი) მიწის ნაკვეთი იმ ტერიტორიაზე, სადაც დღეს „ქვედა პარკი“ მდებარეობს. სწორედ მისი დამსახურებაა ბათუმში ისეთი ეგზოტიკური მცენარეების გაშენება, როგორიცაა კვიპაროსები, პალმები და მაგნოლიები. თუმცა, ბაღი ოფიციალურად მხოლოდ 1912 წლის 3 ნოემბერს გაიხსნა. მის დამფუძნებლად რუსი ბოტანიკოსი, გეოგრაფი და ხარკოვის უნივერსიტეტის პროფესორი ანდრეი ნიკოლოზის ძე კრასნოვი (1862–1915) მიიჩნევა. მან ეს ადგილი აჭარის უნიკალური ნოტიო-სუბტროპიკული მიკროკლიმატის (წელიწადში 2500 მმ-მდე ნალექით) გამო აირჩია, რაც იდეალური პირობა იყო მსოფლიოს სხვადასხვა კუთხიდან ჩამოტანილი მცენარეების აკლიმატიზაციისთვის. 1890-იან წლებში მისი ხელმძღვანელობით სამხრეთ-აღმოსავლეთ აზიაში ორი მასშტაბური ბოტანიკური ექსპედიცია განხორციელდა; ამ მოგზაურობებიდან რუსეთში მრავალი ღირებული მცენარე ჩამოიტანეს, მათ შორის — ჩაი  ანდრეი ნიკოლაევიჩი მისივე ანდერძის თანახმად ბათუმის ბოტანიკური ბაღის ტერიტორიაზე დაკრძალეს; მისი საფლავის ადგილას ძეგლი დაიდგა, რომელიც ბაღის დაარსების 50 წლისთავს აღნიშნავს. დღეისათვის ბოტანიკური ბაღის კოლექცია მოიცავს მერქნიანი მცენარეების დაახლოებით 1 800 ტაქსონომიურ ერთეულს (საერთო შეფასებით, სახეობებისა და ფორმების რაოდენობა 2 000-დან 5 000-მდე მერყეობს), რომელთაგან დაახლოებით 90–100 კავკასიური წარმოშობისაა.