სოხუმი. პროფესორ ოსტროუმოვის სახელობის საქალაქო საავადმყოფო

1900 წლის 21 მაისს სოხუმის საქალაქო საავადმყოფოს პროექტი გადაეგზავნა ქუთაისის ბაზრობის სამმართველოს სამშენებლო განყოფილებას, სადაც 8 ივნისს გუბერნატორის ინჟინერმა დაამტკიცა.  ეს არის სოხუმში აშენებული პირველი სამოქალაქო ჰოსპიტალი – 1902 წლამდე ქალაქში მხოლოდ სამხედრო ჰოსპიტალი იყო. საავადმყოფო 25 საწოლზე იყო გათვლილი, დაყოფილი იყო 19 პალატად, სამედიცინო დაწესებულების საერთო ფართი 695 კვადრატული მეტრი იყო. 1902 წლის 28 მარტს კონტრაქტორმა ივან გორლოვმა დაასრულა საავადმყოფოსკენ მიმავალი ბეტონის კიბის მშენებლობა. ხოლო 1902 წლის 24 აპრილს გაიმართა სოხუმის საქალაქო სათათბიროს ჰოსპიტალური კომიტეტის პირველი სხდომა, სადაც პროფესორი ოსტროუმოვი აირჩიეს საავადმყოფოს საპატიო უვადო რწმუნებულად. 1902 წლის 12 მაისს საავადმყოფომ მუშაობა დაიწყო. 1905 წელს საავადმყოფოს საწოლების რაოდენობა გაიზარდა 35-მდე, ხოლო 1907 წლისთვის 44-მდე. 1908 წელს პროფესორ ოსტროუმოვის გარდაცვალების შემდეგ სოხუმის საქალაქო საავადმყოფოს საპატიო რწმუნებულად აირჩიეს თავადი ნიკოლაი ნიკოლაევიჩ სმეცკოი (1852-1931). მისი სახსრებით 1909 წელს ჩაუტარდა კლინიკის კაპიტალური რემონტი. ამჟამად ამ შენობაში განთავსებულია სოხუმის ონკოლოგიური საავადმყოფო.