ქუთაისის ალექსანდრე ნეველის სახელობის ტაძარი ქალაქის ყოფილ ცენტრალურ მოედანზე (ახლანდელი დავით აღმაშენებლის მოედანი) მდებარეობს. ტაძრის მშენებლობა 1852 წელს დაიწყო და 1871 წელს დასრულდა. ტაძარი მოხატა ცნობილმა მხატვარმა გრიგორი გაგარინმა (1810-1893), ამ ოსტატმა ასევე განაახლა ფრესკები თბილისის სიონში, ბეთანიის მონასტერსა და მრავალ სხვა ქართულ ეკლესიაში. ტაძრის კურთხევა ეპისკოპოსმა გაბრიელ ქიქოძემ (1825-1896) შეასრულა. ტაძრის ტერიტორიაზე დაკრძალულნი არიან ქუთაის-გაენათის ეპარქიის მიტროპოლიტი ანტონი გიორგაძე (1866-1918) და იმერეთის ეპისკოპოსი ბესარიონ დადიანი (1832-1900). სასულიერო პირების გარდა, აქვე არიან დაკრძალულნი 1921 წლის თებერვალში თბილისისთვის ბრძოლებში დაღუპული იუნკერებიც. იმავე წელს საქართველო ბოლშევიკების მმართველობის ქვეშ მოექცა და სამი წლის შემდეგ ალექსანდრე ნეველის სახელობის ტაძარი დაანგრიეს. რა ბედი ეწიათ ტაძრის ტერიტორიაზე დაკრძალულ ნეშტებს, უცნობია.
ქუთაისი. ბაზრის მოედანი ტაძართან
