პეტრეს ციხესიმაგრე ბორჯომის ხეობაში, ლიკანში რომანოვების სასახლის მოპირდაპირედ, მაღალ კლდეზე დგას. ის დიდი კენჭებითაა ნაგები – როგორც ჩანს, ასეთი უნიკალური ნედლეული გამოიყენეს, რადგან ის ფაქტიურად ფეხქვეშ იყო – ციხე მტკვრის ნაპირზე დგას. პეტრეს ციხე ციტადელისა და მასთან დაკავშირებული ქვედა ეზოსგან შედგებოდა. მისი აგების თარიღი უცნობია. ციხე ავალიშვილების მთავრებს ეკუთვნოდათ და ხეობისკენ მიმავალ გზას იცავდა. XVI საუკუნის ბოლოს პეტრეს ციხე თურქებმა აიღეს და აქ თურქული ადმინისტრაციის ცენტრი და გარნიზონი იყო განთავსებული. ზედა და ქვედა იარუსების გარდა, ციხესიმაგრის ტერიტორიაზე შემორჩენილია ორი დიდი აუზი, რომლებიც, სავარაუდოდ, წყალსაცავსა და მარცვლეულის შესანახ ადგილს წარმოადგენდა.
ბორჯომი. პეტრეს ციხის ნანგრევები
